Kur martesat e gjinisë së njëjtë ishin një rit i krishterë

28 Maj 2014 – Përkundër miteve dhe debateve të kohës, koncepti i krishtërimit për martesën nuk është gdhendur në gur që nga ditët e Krishtit, por ka evoluar si koncept dhe ritual. I ndjeri Profesor Xhon Bosuell, shef i Departamentit të Historisë pranë Universitetit të Yale (Jeil) në ShBA zbuloi në dokumentet liturgjike të Kishës antike, bashkësi martesore jo vetëm mes gjinive të ndryshme por edhe mes gjinive të njëjta. Ndër këto dokumenta u zbuluan ceremoni të quajtura “Zyra e Unionve të Gjinisë së Njëjtë (të shekujve të 10të dhe 11të) por edhe të “Urdhërit të Bashkimit të dy Burrave” (shekujt e 11të dhe 12të).

Ritet kishtare ku bashkoheshin dy persona të gjinisë së njëjtë, kishin gjithë simbolikën e martesave heteroseksuale: i gjithë komuniteti mblidhej në kishë, çifti bekohej në altar teksa takonin duart e djathta, bëheshin betimet e shenjta, një prift zyrtarizonte bashkimin përmes Eukarisë[1] dhe gjithçka përfundonte me festën ku merrnin pjesë gjithë të ftuarit. Të gjithë këto elementë shfaqen edhe në ilustrimet artistike të asaj kohe, si përshembull unionin e shenjtë të Perandorit-Luftëtar Bizantin, Bazili i Parë (867-886 Erës së Re) dhe partnerit të tij Xhon.[2]  

Në muzeun a artit të Kievit në Ukrainë, gjendet një ikonë interesante nga Manastiri i Shën Katerinës në Malin Sinai të Izraelit. Aty shfaqen dy shenjtorë të krishterë. Në mes tyre ndodhet një “mblesëtar” (i quajtur ndryshe pronubus) ose shoqërues i çiftit, teksa kujdeset për martesën. Ky pronubus shfaqet të jetë Krishti. Çifti që po martohet janë të dy burra.

Mos vallë ikona sugjeron se është duke u zhvilluar një “martesë” gej e shenjtëruar nga vetë Krishti? Ideja mund të duket shokuese, por përgjigjet vijnë nga vetë burimet e hershme kishtare. E tillë është ikona e Shën Sergius dhe Shen Bachus, dy ushtarë romakë që njihen si martirë të krishtërimit. Këta dy oficerë të ushtrisë romake, provokuan inatin e Perandorit Maksimilian kur u ekspozuan se ishin të krishterë, pasi refuzuan të futen në një tempull pagan. Të dy shenjtorët u dërguan në Siri rreth vitit 303 të Erës sm Re, ku mendohet se Bachus u vra nga gjuajtjet me kamzhik. Ndërkohë mendohet që Sergius ti ketë mbijetuar torturës por më pas vdiq duke i prerë kokën. Legjenda thotë se Bacchusit iu shfaq Sergius si ëngjëll, duke e ftuar të jetë i fortë sepse shumë shpejt ata do të bashkohen në parajsë. 

St. Sergius dhe St. Bacchus

Ndërkohë që vendosja krah për krah e shenjtorëve ishte diçka e zakonshme, sidomos në krishtërimin e hershëm, vendosja krah për krah e këtyre dy burrave konsiderohet nga kritikët si veçanërisht intime. Në një shpjegim të tijin, Severus, Patriarku i Antokias[1] (512-518 e Erës sonë) thoshte se “nuk mund të ndajmë me fjalë ata (Sergius dhe Bachus) që janë bashkuar në jetë. Ky nuk është një rast i thjeshtë dashurie vëllazërore”. Në përshkrimet e bëra gjatë shekullit të 10-të për dy shenjtorët, Shën Sergius festohet si “bashkëudhëtari dhe i dashuri i ëmbël” i Shën Bacchus. Marrëdhënia e ngushtë e Sergius dhe Bachus i ka shtyrë shumë studiues modernë të besojnë së marrëdhënia mes tyre ishte ajo e dy të dashuruarve. Ndërkohë, dëshmia më e fortë që mbështet këtë qëndrim është teksti i parë dhe origjinal i martirizimit të tyre, shkruar në Testamentin e Ri Grek duke i përshkruar ata si “erastai” ose “dashnorët” (lovers). Me fjalë të tjera ata ishin një çift meshkujsh homoseksualë. Lidhja dhe marrëdhënia e tyre jo vetëm që njihej, por pranohej dhe festohej në kishën e hershme e cila del të ketë qenë shumë më tolerante se Kisha e sotme.

Unionet e krishtera mes gjinisë së njëjtë kanë ndodhur edhe në Irlandë gjatë shekujve të 12-të dhe të 13të, siç shkruhet nga historiani Gerald i Wellsit (Geraldus Cambrensis).

Unionet e gjinisë së njëjtë në Europën para-moderne na paraqesin në mënyrë të detajuar disa ceremoni mes gjinisë së njëjtë të gjetura në dokumente liturgjike antike. Një rit grek i shekullit të 13-të përkujtonte Shën Sergin dhe Shën Bacchus, dhe i bënte thirrje Perëndisë të “mbrojë ata, Shërbëtorët e tij, që të dashurojnë njëri-tjetrin dhe të mos jenë shkak skandali për gjithë jetën e tyre, me ndihmën e Perëndisë dhe gjithë Shenjtorëve”. Ceremonia mbyllet me fjalët “dhe ata do të puthin Ungjillin e Shenjtë dhe njëri-tjetrin”.

Një tjetër rit është ai serb i shekullit të 14-të, me bashkimin e dy burrave dhe dy grave, me çiftet që vendosnin duart e tyre të djathta në Ungjill duke mbajtur kryqe në duart e majta. Pasi puthnin Ungjillin, çiftet kërkohej të puthnin njëri-tjetrin, pas të cilit, pas kryerjes së Eukarisë, do ti bekoheshin në bashkim.

Të dhëna për martesa mes gjinisë së njëjtë janë gjetur në arkivat e Vatikanit, Shën Petërburgut, Parisit, Stambollit dhe të Sinait duke mbuluar mbi një mijë vjet nga shekulli i 8-të deri në shekullin e 18-të.

Misionari Domenikan dhe Kryemurgu, Zhak Goar (1601-1653), i përfshin të tilla ceremoni në një koleksion lutjesh ortodokse greke të quajtura “Euchologion Sive Rituale Graecorum Complectens Ritus Et Ordines Divinae Liturgiae”. (Paris 1667)

Ndërkohë që homoseksualiteti ishte teknikisht i paligjshëm që në epokën romake, shkrimet homofobike nuk u shfaqën në Europën Perëndimore deri në fund të shekullit të 14-të. Edhe atëhere, Kisha vazhdoi të shenjtëroje martesat mes gjinisë së njëjtë.

Në Kishën e Shën Gjon Lateranit në Romë (e njohur tradicionalisht si kisha e famullisë së Papës), në vitin 1578 u bashkuan në martesë plot 13 çifte të gjinisë së njëjtë, gjatë një ceremonie madhështore e cila u bashkë-përgatit me klerikët e lartë të Vatikanit. Sipas raportit të kohës ata u martuan “duke u bashkuar, duke përdorur të njëjtat Shkrime të Shenjta, pas të cilit ata hëngrën dhe fjetën bashkë”. Një tjetër çift grash është raportuar të jenë martuar në Dalmaci në shekullin e 18-të.

Kërkimet akademike të Profesor Boswellit janë kaq të mirë dokumentuara dhe të vëertetuara saqë ngrejnë pyetje serioze mbi liderët modernë të Kishës dhe të krishterëve heteroseksualë mbi sjelljen e tyre kundrejt homoseksualitetit.

Që Kisha të injorojë faktet historike të evidentuara nga vetë arkivat e saj mund të quhet burracakëri dhe mashtrim. Faktet tregojnë në mënyrë bindëse se atë çka Kisha modern e quan si qëndrimin e saj tradicional dhe të pandryshuar kundrejt homoseksualizmit është në fakt krejt ndryshe.

Kjo vërteton në fakt, se përgjatë dy mijëvjeçarëve të fundit, në famulli dhe katedrale të të gjithë krishtërimit, nga Irlanda në Stamboll apo edhe në zemër të vetë Romës, marrëdhëniet homoseksuale janë pranuar si shprehje të vlefshme të dashurisë së falur nga vetë Perëndia, me gjithë përkushtimin e dy njerëzve për njëri-tjetrin, një dashuri që mund të festohet, nderohet, bekohet përmes Eukarisë, në emër të dhe me praninë e Jezu Krishtit.

FUND

Përktheu në Shqip:  Amarildo Fecanji

Artikulli origjinal në anglisht: http://anthropologist.livejournal.com/1314574.html

Shkrim I Thos Payne nga The Colfax Record

Shënim: Ambasada PINK / LGBT Pro është anëtare e Rrjetit Ndërfetar Global për mbrojtjen e personave me orientim seksual dhe identitet gjinor të ndryshëm (GIN Network). Ky rrjet ndër të tjera synon të ndërtojnë një dialog të shëndetshëm dhe pozitiv midis lëvizjes LGBT në botë dhe institutioneve fetare dhe promovimin e mirëkuptimit, tolerancës dhe pranimit të personave LGBT në komunitetet e të gjitha besimeve fetare në botë.

---

[1] Antokia – Qytet antik grek, i pozicionuar ne Turqine jugore, buze detit Mesdhe. Shen. i përkthyesit

---

[1] Eukaria – Ceremoni e krishterë që përkujton Darkën e Fundit, gjatë të cilës buka dhe vera bekohen dhe më pas konsumohen. Shënim i Përkthyesit.

[2] http://queerhistory.blogspot.com/2010/09/basil-i-of-byzantium-867-886.html Artikull mbi jetën e Perandorit Bizantin. Shënim i Përkthyesit.

Prokuroria e Përgjithshme të hetojë për mashtrim dhe nxitje urrejtje nënshkruesit e peticionit “Familje e Shëndoshë, atdhe i shëndoshë”

Tiranë, 26 Maj 2014 - Ambasada PINK dhe Shtëpia e të Drejtave të Njeriut në Shqipëri kanë mësuar prej disa ditësh publikimin e një peticioni të nënshkruar nga 57 të ashtë-quajtur intelektualë, nën titullin “Familje e shëndoshë, atdhe i shëndoshë”. Ky peticion, i cili nxit publikisht urrejtjen kundër personave me orientim seksual dhe identitet gjinor LGBT, në Shqipëri, Kosovë dhe Maqedoni, u publikua fillimisht në faqen 7 të Gazetës Panorama, të datës 21 Maj 2014.

Ndërkohë ditën e enjte, në po të njëjtën gazetë, Dr. Agron Gjekmarkaj, emri i të cilit ishte publikuar zyrtarisht si nënshkrues i peticionit prej 57 personash, deklaroi publikisht se ai nuk ishte nënshkrues I peticionit (Gazeta Panorama, datë 22 Maj 2014, reagim nga Agron Gjekmarkaj nën titullin “Teknologjia e fabrikimit të peticioneve”.

Po në datë 22 Maj 2014, në versionin on-line të gazetës Panorama (www.panorama.com.al) tek artikulli i botuar në datë 21 Maj në lidhje me peticionin, nga version origjinal i 57 intelektualëve nënshkrues, hiqen pa asnjë shpjegim dy emra: Agron Gjekmarkaj dhe Alfred Lela (zv.kryeredaktor i Gazetës MAPO).

Këto denoncime dhe ndryshime tregojnë se një pjesë e nënshkruesve të peticionit janë mashtruar qëllimisht nga ata që kanë nxitur nënshkrimin e këtoj peticioni diskriminues, duke përdorur në mënyrë të pa-autorizuar emrat e disa personave dhe rrjedhimisht duke mashtruar publikisht opinionin publik në lidhje me këtë çështje. Në bindjen tonë autorët dhe nxitësit e këtij peticioni kanë kryer të paktën 2 vepra penale të dënueshme nga Kodi Penal dhe që për më tepër mos-ndëshkueshmëria e tyre vetëm do të nxisë rrezikshmërinë shoqërore të nënshkruesve të saj dhe të atyre që besojnë se urrejtja dhe diskriminimi janë zgjidhje.

Nisur nga sa më sipër ne i kërkojmë Prokurorisë së Përgjithshme të hapë në mënyrë të menjëhershme hetime për mashtrim (Neni 143 i Kodit Penal) dhe Nxitjen e urrejtjes ose grindjeve (Neni 265 i Kodit Penal), duke marrë në konsideratë edhe nenin 50, pika “j” të Kodit, pasi autorët e kanë kryer veprën penale në rrethana rënduese.

Komuniteti LGBT pret nga institucionet e zbatimit të ligjit që ato të mbrojnë të drejtat e çdo personi, kur ata rrezikohen nga krimi. Në këtë aspekt Prokuroria ka një përgjegjësi në ndjekjen e çdo rasti të tillë ku rrezikohet një grup i tërë shoqëror nga diskriminimi dhe krimet e urrejtjes.

Ambasada PINK / LGBT Pro Shqipëri

Shtëpia e të Drejtave të Njeriut në Shqipëri

Peticioni i pseudo-intelektualeve të kohës së Enver Hoxhës nxit vetëm urrejtjen dhe ndasitë në shoqërinë shqiptare!

Ambasada PINK dhe Shtëpia e të Drejtave të Njeriut janë njohur gjatë ditës së sotme nga Gazeta Panorama me një të ashtëquajtur Peticion të 57 pseudo-intelektualëve, të cilët ndër të tjera kanë një të përbashkët: nxitjen e urrejtjes dhe homofobisë ndaj cdo personi LGBT dhe mbështetësve të tyre në Shqipëri. Reagimi me ç’duket është grahma e fundit e injorancës dhe paditurisë intelektuale, që kërkon të refuzojë dijen dhe shkencën, vlerat dhe moralin më të mirë të shoqërisë, ku çdo njeri gëzon të drejtat në mëyrë të barabartë të pacënuara nga askush.

Peticioni të kujton fletë-rrufetë e kohës së Enver Hoxhës, ku pseudo-intelektualët pa vlera morale dhe ideologjike, të shtyre si hijena nga partia e punës, dërgonin në purgatorin e vrasjeve dhe pushkatimeve njerëz të pafajshëm, për të vetmen arsye se ata luftonin për një shoqëri të hapur, demokratike, ku çdo njeri të respektohej në të drejta dhe dinjitet.

Pabukësia mendore e këtyre pseudo-intelektualëve, që ende nuk e kanë bërë publike se cilat qarqe i kanë nxitur për të mbajtur një reagim të tillë të brujtur në halet e urrejtjes, kërkon të mbajë nën errësirën e injorancës dhe paditurisë çdo qytetar shqiptar që ëndërron të jetë i njëjtë dhe i barabartë me çdo qytetar europian. Thirrja, përpos nxitjes së urrjejtes shoqërore, paragjykon vlerat më të mira të shoqërisë së brishtë në Shqipëri, duke kërkuar që të na shpjerë në Anadoll apo Arabinë Saudite, ku gratë duhet të jenë të mbuluara me shami kokë e këmbë dhe personat LGBT duhen dënuar me vdekje.

Të jesh person LGBT do të thotë që je PRO-FAMILJES! Të jesh person LGBT do të thotë që je për një shoqëri, ku secili jeton i barabartë në dinjitet dhe në vlera. Të jesh person LGBT do të thotë të luftosh kundër urrejtjes, diskriminimit, pabarazisë dhe paditurisë shoqërore! Rreziku familjes shqiptare nuk i vjen as komuniteti LGBT, as nga Paradat apo shfaqet e orientimit seksual dhe identitetit gjinor. Rreziku i familjes shqiptare qëndron tek pabarazia, ku çdo anëtar i familjes duhet të jetë e nënshtruar përkundrejt burrit dhe ku ai dhe vetëm ai mund të vendos për këdo e për çdo gjë!

Shqipëria nuk është Lindje – Shqipëria është Perëndim! Në këtë vend intelektualët e vërtetë ia kanë dedikuar jetën përparimit të Shqipërisë si pjesë e Europës me vlera perëndimore. Në një shoqëri të barabartë çdo njeri është i barabartë dhe gëzon të njëjtat të drejta. Thirrja jonë sot është: Liri - Barazi – Vëllazëri!

URRJEJTJA NUK ËSHTË ZGJIDHJA! THUAJ PO DASHURISË!

Ambasada PINK takohet me Bankën Botërore në Washington

30 Prill 2014 - Përfaqësuesi i Ambasadës PINK / LGBT Pro Shqipëri Z. Altin Hazizaj mori pjesë, në datat 6-12 Prill, në takimin konsultues të Bankës Botërore mbi çështje të orientimit seksual dhe identitetit gjinor (SOGI) në washington, SHBA. Aktivitetet u zhvilluan në kuadër të përpjekjeve të Bankës Botërore për t’iu bashkuar nismave globale në luftën kundër diskriminimit për shkak të orientimit seksual dhe identitetit gjinor.

Takimet e punës u zhvilluan me Presidentin e Bankës Botërore Z. Jim Kim si dhe Drejtorin Ekzekutiv për Shqipërinë, Italinë dhe Greqinë Z. Piero Cipollone. Pjesë e aktiviteteve ishin edhe një seancë dëgjimore në Kongresin Amerikan, një tryezë pune me kongresmenë të ndryshëm dhe takimi me përfaqësues të Administratës së Presidentit të SHBA-ve, Barak Obama.

Aktivistët LGBTI vinin nga pjesë të ndryshme të botës si Shqipëria, Polonia, India, Libani, Brazili, Nigeria, Uganda, Filipinet, Kina, Rusia, Meksika, Kosta Rika dhe Guiana. Ata mundën të ndajnë historitë e diskriminimit dhe persekutimit që personat LGBTI vuajnë mbi baza të orientimit seksual dhe identitetit gjinor. Takimet shërbyen për të ndarë perspektivat e punës që aktivistët bëjnë në vendet e tyre dhe sfidat që hasen për shkak të shtypjes dhe diskriminimit sistematik.

Në shumë vende të botës, Banka Botërore financon projekte në fushën e shëndetësisë, uljes së varfërisë dhe asistencës ndaj refugjatëve. Por për shkak të ligjeve që kriminalizojnë homoseksualitetin ose mungesës së praktikave të mira shumë nga këto fonde nuk shkojnë për pjesë vulnerabël të shoqërisë siç mund të jenë edhe personat LGBT. Aktivistët patën mundësinë të evidentojnë se shpesh fytyrat e varfërisë në vende të ndryshme të botës, përfshi edhe Shqipërinë, janë minoritetet seksuale si klasa të përjashtuara dhe diskriminuara në mjedisin e punës, arsim, shërbimet shëndetësore dhe mbështetjen financiare çka rezulton në veçimin e mëtejshëm të personave LGBT.

 17 anëtarë të Bordit të Drejtorëve Ekzekutivë u takuan me aktivistët për tu njohur me kërkesat e tyre, prej të cilave kryesorja ishte angazhimi i mëtejshëm i BB-re jo vetëm në adresimin e diskriminimit kundër grave dhe personave LGBT por gjithashtu edhe në lehtësimin e hulumtimeve mbi pasojat e diskriminimit.

Së shpejti BB do të përgatisë një model të ri investimi në nivel global, ku ndër të tjera do kërkojë më shumë angazhim dhe përpjekje të shteteve për zhvillimin dhe përparimin e njerëzve pavarësisht orientimit të tyre seksual apo identitetit gjinor.

Në mbrojtje të fjalës së lirë? Arsimi dhe punësimi në pararojë të saj

Kërcënimi më i madh për lirinë e shprehjes vjen kur njerëzit dhe institucionet e marin atë për të qenë dhe nuk bëjnë asgjë për mbrojtjen, garantimin dhe avancimin e saj.

Nga Amarildo Fecanji

10 Prill 2014 – 17 Maji po njihet gjithmonë e më tepër, në Shqipëri dhe në vende të tjera, si Dita Ndërkombëtare kundër Homofobisë dhe Transfobisë (IDAHOT). Fushatat, aktivitetet dhe puna e palodhur e aktivistëve lesbike, gej, biseksualë dhe transgjinorë (LGBT), kanë filluar të kenë efektin e tyre pozitiv. Në vendin tonë me kalimin e viteve aktivitetet kanë parë më shumë pjesëmarrës dhe ndërgjegjësimi ka arritur një audiencë gjithmonë e më të lartë.

Por sfidat, ashtu siç merret me mend, janë të shumta, sepse homofobia e transfobia, ashtu si racizmi, misogjinia e diskriminimi i shumëfshtë janë ende mbizotëruese në kulturën popullore, politike dhe mediatike të vendit. Ndërkohë që aktivistët LGBT shqiptarë, gëzojnë, si gjithë qytetarët e tjerë të drejtën dhe lirinë e shprehjes, fenomene të tilla si auto-çensura, keq-informimi, keq-citimi, sulmet verbale dhe fyese në media e jetën publike dhe propaganda homofobike kundër personave LGBT dhe të drejtave të tyre mbeten shumë problematike.

Një nga çështjet sfiduese në këtë aspekt mbetet kriminalizimi i fjalimeve që nxisin urrejtjen, dhunën dhe veprime të tjera negative kundër personave LGBT. Kjo nuk është aq e lehtë sa mund të duket. Një nga problemet e një ligji kundër fjalimeve të urrejtjes është përkufizimi i fjalës “urrejtje”. Ndryshe nga dhuna dhe krimet fizike, urrejtja është shumë më subjektive. Kështu edhe vija midis fjalimeve të urrejtjes dhe këndvshtrimeve thjesht kundërshtuese dhe homofobike është e hollë dhe shpesh e padukshme.

Fjala e lirë, shprehja e mendimit pranues, kundërshtues apo i çfarëdolloji qoftë ai, është një nga themelet e funksionimit të një shoqërie demokratike, dhe i duhet garantuar të gjithë qytetarëve, qofshin ata mbrojtës apo kundërshtarë të të drejtave LGBT. Por kufiri duhet caktuar. Edhe pse termat ofendues ndaj një grupi social nuk duhet të shërbejnë si argument për të vendosur ligje e sanksione kundër atyre që i përdorin ato, dallimi duhet bërë midis fjalimeve që janë thjesht shprehje e opinionit ndryshe me ato që përbëjnë nxitje, thirrje dhe ftesë për dhunë apo veprim që mund të quhet kriminal kundër një qytetari, për shkak të orientimit të tij/saj seksual apo identitetit gjinor.

Ambasada PINK / LGBT Pro Shqipëri beson se liria e shprehjes, si një e drejtë themelore dhe e patjetërsueshme, duhet ruajtur dhe garantuar në mënyrë të dedikuar nga të gjitha grupet e interesit që përbëjnë shoqërinë e sotme. Ndërkohë që institucionet shtetërore dhe shteti shqiptar kanë marrë hapa shumë pozitive në garantimin e plotë të së drejtës së shprehjes, në përputhje me kushtetutën e ligjet ndërkombëtare dhe kanë ngritur struktura të posaçme për mbrojtjen e zbatimin e tyre, shumë punë mbetet për tu bërë. Ne besojmë se më shumë rëndësi i duhet dhënë edukimit, arsimimit dhe ndërgjegjësimit për mbrojtjen dhe garantimin e lirisë së shprehjes, sidomos të grupeve vulnerabël. Institucionet shqiptare të ngarkuara më arsimimin, mbrojtjen nga diskriminimi, nga abuzimi i autoriteteve, nga trajtimi jo-etik dhejo- dinjitoz duhet të tre-fishojnë përpjekjet e tyre për të implementuar, bërë të njohura dhe integruar në sistemin shoqëror principet e mbrojtjes së të drejtës së shprehjes, me një vlerë të vecantë për minoritetet dhe grupet e diskriminuara. Sistemi arsimor dhe ai i punës duhet të integrohet në atë mënyrë që standartet e barazisë, diversitetit dhe mbrojtjes së minoriteteve të jenë të matshme dhe të domosdoshme për prindërit dhe rekrutimin e punësimin në institucione publike e private.

Në përmbyllje, mbrojtja e  lirisë së shprehjes duhet të shkojë në paralel me mbrojtjen e minoriteteve vulnerabël nga fjalimet e urrejtjes, në mënyrë të vecantë ato që nxisin dhe promovojnë dhunën. Shembujt negativë nga disa vende autokratike duhet të shërbejnë për të demonstruar se sa e rrezikuar është fjala e lirë, nëse qytetarët dhe institucionet nuk marrin masat e duhura dhe nuk punojnë sa duhet për ta mbrojtur atë.

Ambasada PINK prezanton bizneset miqësore ndaj komunitetit LGBT

7 Prill 2014 - Ambasada PINK / LGBT Pro Shqipëri, prej disa javësh ka lançuar faqen më të re me tematikë LGBT në vend, www.lgbtravelalbania.com . Me mbështetjen e projektit LGBT të Këshillit të Europës, me pjesëmarrjen e organizatave LGBT në vend dhe e përkrahur nga Agjencia Kombëtare e Turizmit, faqja synon të jetë një nga burimet kryesore të informacionit për vizitorët LGBT të huaj dhe shqiptarë.

Shumengjyrat e syrit te kalter

E ndërtuar për të qenë sa më e lehtë dhe praktike faqja ka dy audienca kryesore: të parët janë bizneset, aktivitetet e ndryshme publike dhe private të cilat janë miqësore, jo-diskriminuese dhe përkrahëse ndaj personave LGBT, dhe të dytët janë vetë personat LGBT, shqiptarë dhe të huaj të cilët duan të udhëtojnë në destinacione të sigurta dhe të përdorin shërbime jo-diskriminuese ndaj tyre.

Edhe pse Shqipëria është shumë larg të qenurit një destinacion favorit për personat LGBT, për arsye të tilla si infrastrukturë e dobët dhe mungesë e destinacioneve tradicionale për këtë komunitet, dhe me bindjen se çdo shtet, qytet dhe fshat i botës duhet të jetë i sigurtë dhe miqësor ndaj personave LGBT, Ambasada PINK ka menduar krijimin e kësaj faqeje si eksplorim i një terreni të ri prej nga mund të avancohen të drejtat LGBT.

Shërbimet miqësore lidhen me të ndierit të pranuar, të vlerësuar dhe të lirë për tu prezantuar vetëm apo së bashku me partnerët si persona LGBT. Punësimi, një tjetër fushë shumë domethënëse për personat LGBT, mund të jetë një tjetër opsion pozitiv përmes kësaj faqe.

Nje ylber mbi qiellin e Korces

Ndërkohë, www.lgbtravelalbania.com nuk synon të japë perceptimin e gabuar se të drejtat LGBT janë plotësisht të respektuara apo se komuniteti LGBT është plotësisht i integruar në shoqërinë shqiptare. Pavarësisht historive të ndryshme të suksesit dhe arritjeve domethënëse të lëvizjes LGBT, komuniteti vazhdon të jetë në pjesën më të madhe i fshehur pas kornizës heteronormative dhe vizibiliteti i tyre mbetet shumë i ulët.  

Ambasada PINK / LGBT Pro Shqipëri fton të gjitha bizneset, zyrat ligjore, klinikat dhe institucionet e ndryshme private apo publike që të rregjistrojnë aktivitetin e tyre në këtë faqe dhe të jenë kështu një derë e hapur edhe për qytetarët lgbt. Gjithashtu, PINK fton Ministrinë e Turizmit, Ministrinë e Mirëqenies Sociale dhe Rinise, Dhomat e Tregtisë dhe Bashkitë e vendit që të mbështesin dhe promovojnë këtë portal si një hap i mëtejshëm drejt garantimit të barazisë dhe trajtimit miqësor, dinjitoz dhe të qytetëruar të vizitorëve LGBT shqiptarë dhe të huaj. Gjithashtu, PINK fton komunitetin ndërkombëtar në Shqipëri që të promovojnë këtë portal me bizneset e huaja të pranishme në Shqipëri.

Koncepti bazë i krijimit të kësaj faqe është besimi se të gjithë qytetarët, shqiptarë apo të huaj, duhet të trajtohen me respekt, në mënyrë jo-paragjykuese dhe në përputhje me rregullat dhe normat e një shoqërie të qytetëruar nga çfarëdolloj biznesi apo industrie. Ndërkohë që koncepti gay-friendly është një term më shumë amerikan sesa shqiptar, ai përputhet plotësisht me ato që mund të njihen si nevojat bazë të personave LGBT për të mos u ndier të diskriminuar apo të përjashtuar për shkak të orientimit të tyre seksual apo identitetit gjinor.