Maqedoni, Parlamenti mund të ndalojë martesat e gjinisë së njëjtë me Kushtetutë. Reagojnë organizatat.

14 Korrik 2014 – Parlamenti maqedonas pritet që këto ditë të diskutojë një mocion të ri për të bërë ndryshime në Kushtetutë me qëllim ndalimin e martesave të gjinisë së njëjtë dhe të drejtës sa adoptimit.

Ky mocion synon që ta përkufizojë martesën në mënyrë strikte si një bashkim midis një burri dhe një gruaje, dhe ka qenë një nga premtimet e partisë nacionaliste në pushtet drejtuar nga Kryeministri Nikola Gruevski.

Që të miratohet mocioni ka nevoje për 2/3 e votave, çka do të thotë se për të kaluar ligjin duhet edhe mbështetja e partive më të vogla. Konkretisht pritet që Partia Demokratike Shqiptare e Maqedonisë të japë ato vota që do bënin të mundur këtë ndryshim.

Në lidhje me këto ndryshime në Kushtetutë ka reaguar partia më e madhe opozitare, Social Demokratët, të cilën refuzojnë të mbështesin mocionin, duke e quajtur atë të vjetëruar.

Reagojnë aktivistët

Në një letër të hapur, dërguar deputetëve shqiptarë të Parlamentit maqedonas, aktivistët e LGBT United Macedonia i apelojnë faktorit politik të përmbahet dhe të mos i aprovojë këto ndryshime të cilat do ti caktonin personat LGBT si qytetare të dorës së dytë. Ata i kujtojnë politikanëve se personat LGBT janë edhe mes shqiptarëve dhe se kjo çështje nuk i përket vetëm një komuniteti apo nacionaliteti.

Situata ligjore dhe sociale e komunitetit LGBT në Maqedoni ka qenë shumë e vështirë gjatë viteve të fundit, sidomos për shkak të politikës homofobike të qeverisë Gruevski. Aktivistët LGBT dhe shoqëria civile në vend prej kohësh kërkojnë përfshirjen e orientimit seksual dhe identitetit gjinor në ligjin anti-diskriminim të vendit.

Prokuroria e Përgjithshme të hetojë për mashtrim dhe nxitje urrejtje nënshkruesit e peticionit “Familje e Shëndoshë, atdhe i shëndoshë”

Tiranë, 26 Maj 2014 - Ambasada PINK dhe Shtëpia e të Drejtave të Njeriut në Shqipëri kanë mësuar prej disa ditësh publikimin e një peticioni të nënshkruar nga 57 të ashtë-quajtur intelektualë, nën titullin “Familje e shëndoshë, atdhe i shëndoshë”. Ky peticion, i cili nxit publikisht urrejtjen kundër personave me orientim seksual dhe identitet gjinor LGBT, në Shqipëri, Kosovë dhe Maqedoni, u publikua fillimisht në faqen 7 të Gazetës Panorama, të datës 21 Maj 2014.

Ndërkohë ditën e enjte, në po të njëjtën gazetë, Dr. Agron Gjekmarkaj, emri i të cilit ishte publikuar zyrtarisht si nënshkrues i peticionit prej 57 personash, deklaroi publikisht se ai nuk ishte nënshkrues I peticionit (Gazeta Panorama, datë 22 Maj 2014, reagim nga Agron Gjekmarkaj nën titullin “Teknologjia e fabrikimit të peticioneve”.

Po në datë 22 Maj 2014, në versionin on-line të gazetës Panorama (www.panorama.com.al) tek artikulli i botuar në datë 21 Maj në lidhje me peticionin, nga version origjinal i 57 intelektualëve nënshkrues, hiqen pa asnjë shpjegim dy emra: Agron Gjekmarkaj dhe Alfred Lela (zv.kryeredaktor i Gazetës MAPO).

Këto denoncime dhe ndryshime tregojnë se një pjesë e nënshkruesve të peticionit janë mashtruar qëllimisht nga ata që kanë nxitur nënshkrimin e këtoj peticioni diskriminues, duke përdorur në mënyrë të pa-autorizuar emrat e disa personave dhe rrjedhimisht duke mashtruar publikisht opinionin publik në lidhje me këtë çështje. Në bindjen tonë autorët dhe nxitësit e këtij peticioni kanë kryer të paktën 2 vepra penale të dënueshme nga Kodi Penal dhe që për më tepër mos-ndëshkueshmëria e tyre vetëm do të nxisë rrezikshmërinë shoqërore të nënshkruesve të saj dhe të atyre që besojnë se urrejtja dhe diskriminimi janë zgjidhje.

Nisur nga sa më sipër ne i kërkojmë Prokurorisë së Përgjithshme të hapë në mënyrë të menjëhershme hetime për mashtrim (Neni 143 i Kodit Penal) dhe Nxitjen e urrejtjes ose grindjeve (Neni 265 i Kodit Penal), duke marrë në konsideratë edhe nenin 50, pika “j” të Kodit, pasi autorët e kanë kryer veprën penale në rrethana rënduese.

Komuniteti LGBT pret nga institucionet e zbatimit të ligjit që ato të mbrojnë të drejtat e çdo personi, kur ata rrezikohen nga krimi. Në këtë aspekt Prokuroria ka një përgjegjësi në ndjekjen e çdo rasti të tillë ku rrezikohet një grup i tërë shoqëror nga diskriminimi dhe krimet e urrejtjes.

Ambasada PINK / LGBT Pro Shqipëri

Shtëpia e të Drejtave të Njeriut në Shqipëri