Qeveria shqiptare t’i kërkojë Bankës Botërore të ndryshojë politikat mbrojtëse për grate dhe personat LGBT

25 Korrik 2014 – Ambasada PINK / LGBT Pro në mbështetje të përpjekjes globale të aktivistëve LGBT dhe atyre të të drejtave të grave dhe vajzave, i kërkon Qeverisë shqiptare dhe Ministrive të Jashtme, të Financave dhe Mirëqënies Sociale që ti kërkojnë Bankës Botërore të ndryshojë dhe përmirësojë politikat e saj të investimit, duke rritur efektivisht dhe konkretisht masat mbrojtëse për grupet e shoqërisë që janë ndër më të prekurat nga varferia, përkatësisht gratë dhe personat LGBT.

Në takimin e parë të realizuar, Prillin e kaluar midis aktivistëve LGBT nga e gjithë bota dhe sektorit të barazizë gjinore pranë Bankës Botërore, ku ishte e pranishme edhe Ambasada PINK, u diskutua mbi angazhimin e Bankës për të përgatitur një model të ri investimi në nivel global, ku ndër të tjera do të kërkohet më shumë angazhim dhe përpjekje nga autoritetet shtetërore për të ndihmuar zhvillimin e qytetarëve të tyre pavarësisht orientimit seksual apo identitetit gjinor.

Drafti i fundit i politikave mbrojtëse të Bankës Boterore është zhgënjyes sepse ai nuk adreson nevojat e grave, vajzave dhe minoriteteve seksuale e gjinore. Politikat mbrojtëse të Bankës janë krijuar për të shmangur dhe minimizuar impaktin negativ social dhe mjedisor të projekteve të financuara prej saj, veçanërisht në lidhje me grupet e varfra dhe të margjinalizuara. Në vendet ku operon Banka gratë, vajzat dhe minoritetet seksuale e gjinore janë shpesh ndër më të varfrat dhe të margjinalizuarat.

Gratë dhe vajzat vuajnë në mënyrë jo-proporcionale nivele të larta të dhunës. Mesatarisht ato fitojnë 20% me pak se burrat dhe asnjë rajon i botës nuk ka arritur objektivin 5 të Zhvillimit të Mijëvjeçarit, që synon të ulë vdekshmërinë e nënave me ¾ brenda vitit 2015. Në të njëjtën mënyë, minoritetet seksuale dhe gjinore shpesh vuajnë dhunë, diskriminim të vazhdueshëm dhe margjinalizim. Çmimi i përjashtimit të tyre ekonomik është shumë i lartë. Sipas rezultateve paraprake të studimit “Kostoja e homofobisë” humbjet ekonomike që vijnë nga përjashtimi i minoriteteve seksuale dhe gjinore në një vend si India, mund të shkojë deri në 30.8 miliarda dollare, ose 1.7% e PPB-së. Implementimi i politikave gjithëpërfshirëse e mbrojtëse për minoritetet seksuale dhe gjinore do të bënin të mundur që të integroheshin nevojat specifike të grupeve të margjinalizuara, të përfitonin nga projektet zhvilluese të Bankës Botërore dhe të kishin mundësi të merrnin pjesë në ekonominë e vendit të tyre.

Në draftin e rij, gratë, minoritetet seksuale dhe gjinore, përmenden brenda një liste shumë të gjatë grupesh vulnerabël, të cilave Banka do “t’u japë vëmendjen e nevojshme”. Ndërkohë, Banka deklaron se në politikat e saj të reja do të “sigurohet që të mos ketë paragjykim apo diskriminim ndaj grupeve apo individëve vulnerabël”. Pavarësisht një pune dy-vjeçare, Banka Botërore nuk arriti të shkojë përtej referencave sipërfaqësore për gratë, vajzat dhe minoritetet seksuale e gjinore dhe deklaratave të vakëta gjithpërfshirëse. Drafti nuk është i qartë përsa i takon mënyrave se si do bëjë të mundur adresimin e nevojave të minoriteteve. Vetë dispozitat janë të varuara nga hapësira e madhe e veprimit që u lejohet stafeve të Bankave dhe vendeve huamarrëse për të vendosur vetë se si, kur dhe në çfarë mënyrë ti përshtasin masat mbrojtëse. Për aq kohë sa Banka i shmanget vendosjes së standarteve të qarta, masave llogaridhënëse, dhe qëllimeve të qarta, situata e grupeve të margjinalizuara nuk do të përmirësohet nga masat mbrojtëse aktuale.

Banka Botërore duhet të mbajë premtimin e saj duke u siguruar që gratë, vajzat, dhe minoritetet seksuale e gjinore të përfitojnë njësoj nga investimet e saj. Për të arritur këtë, politikat e reja mbrojtëse duhet të përfshijnë masa të posaçme mbi Orientimin Gjinor dhe Seksual dhe Identitetin Gjinor dhe Shprehjen Gjinore (SOGIE) me standarte për vlerësimin social, mbikqyrjen e qartë të progresit dhe strukturat monitoruese si dhe një implementim të detajuar të planit dhe buxhetit të cilat vlerësojnë nevojat dhe çështjet specifike të këtyre grupeve shoqërore.

Nënshkruar nga:

Altin Hazizaj, Shqipëri

Bisi Alimi, Nigeri

Clare Byarugaba, Ugandë

Jonas Bagas, Filipine

Khemraj Persaud, Guyana

Mirosłaëa Makuchoëska, Poloni

Xiaogang Ëei, Kinë

Xin Ying, Kinë

FUND

Nis projekti i qyteteve miqësore për personat LGBT

17 Korrik 2014 – Ambasada PINK / LGBT Pro Shqipëri zhvilloi sot trajnimin e parë me tematike  LGBT me përfaqësues të lartë të gjashtë Bashkive të vendit. Drejtues të sektorëve kyçë, nga Bashkitë Tiranë, Durrës, Elbasan, Korçë, Vlorë dhe Shkodër si dhe përfaqësues nga zyra e Avokatit të Popullit (AP) dhe Komisionerit për Mbrojtjen nga Diskriminimi (KMD) ishin të pranishëm në trajnim. 

Copyright: PINK Embassy 2014

Ky aktivitet, është i pari në kuadër të Projektit “Përmirësimi i jetës së personave LGBT në nivel lokal” implementuar nga Ambasada PINK / LGBT Pro Shqipëri në bashkëpunim me AP dhe KMD dhe me mbështetjen e Bashkimit Europian. Projekti synon të risë njohuritë e punonjësve të Bashkive, OJF-ve, mediave, shkollave dhe institucioneve të tjera në gjashtë qytetet e sipërpërmendura, me synim rritjen e ndërgjegjësimit të vetë institucioneve mbi këtë çështje por edhe integrimin e tematikës LGBT përtej Tiranës. 

Ekspertët e Bashkive, të cilët vinin me një eksperiencë të gjatë dhe të vyer në punët me komunitetet e ndryshme në nevojë dhe grupet e ndryshme sociale, morën njohuri të detajuara mbi përkufizimet LGBT, problematikat, dhe çështjet të tilla si çështjet gjinore, heteronormativiteti, interseksionaliteti, fjalimet dhe krimet e urrejtjes, ligji anti-diskriminim, shembuj pozitive etj. 

Vetë ekspertët dhanë një kontribut të çmuar në realizimin e trajnimit, me njohuritë e tyre. Në vlerësimin e tyre ata gjykuan se trajnime dhe aktivitete ndërgjegjësuese me temën LGBT duhet të bëhen me sa më shumë punonjës të administratës publike dhe me një pjesëmarrje më të gjerë nga grupe të ndryshme interesi. Ata gjithashtu vlerësuan synimin e këtij projekti për të realizuar fushata ndërgjegjësuese, leksione dhe prezantime me grupe të ndryshme nga të gjashtë qytetet që janë përfituese të projektit. 

Gjatë 12 muajve të fundit, Ambasada PINK realizoi takime pune me Kryetarët dhe nën-Kryetarët e Bashkive Durrës, Elbasan, Korçë, Tiranë, Vlorë dhe Shkodër dhe gjeti mbështetjen e tyre maksimale për të nisur me prezantimin dhe njohjen e kësaj çështje edhe në nivel vendor. 

Pjesë e këtij projekti është edhe realizimi i studimeve mbi situatën e diskriminimit dhe bulizmit në shkollat e mesme dhe zhvillimi i trajnimeve me mësues dhe psikologë nga shkollat e qyteteve përfituese.

Ambasada PINK vlerësohet me çmimin ACT Now!

26 Qershor 2014 – Ambasada PINK / LGBT Pro Shqipëri u vlerësua me çmimin ACT Now! Champion Award, në një ceremoni të realizuar pranë Ambasadës së Shteteve të Bashkuara të Amerikës në Tiranë.

I ideuar në vitin 2012 nga Ambasadori Z. Aleksandër Arvizu, çmimi i përmuajshëm i shkon iniciativave të individëve apo grupeve që punojnë për avancimin e kauzave të ndryshme sociale, ekonomike dhe politike. Në argumentimin e çmimit shkruhet “për përpjekjet e tyre në bazë për të mbrojtur të drejtat LGBT dhe për të luftuar diskriminimin kundër personave LGBT”.

Në fjalën e tij përshëndetëse, Ambasadori Arvizu u shpreh se kauza LGBT në Shqipëri ka njohur një progres të madh dhe të vazhdueshëm dhe se ndërkohe rruga drejt arritjes së barazisë është e gjatë. Ai kujtoi se dikur edhe në një vend si ShBA-të ekzistonte diskriminimi racial, madje i njohur si i tillë edhe ligjërisht, diçka që është e paimagjinueshme sot. Ai përshëndeti aktivistët LGBT dhe i uroi ata në përpjekjet e tyre duke iu kujtuar se ndodhen në krahun e duhur të historisë.

Në fjalën e tij përshëndetëse, përfaqësuesi i Ambasadës PINK / LGBT Pro Shqipëri, Amarildo Fecanji u shpreh se ndërkohë që avancimi i të drejtave LGBT, si një kauzë që nuk gëzon popullaritet kërkon kurajo, po aq kurajo kërkon edhe mbështetja hapur e aleatëve dhe grupeve të interesit që janë vendosur përkrah të drejtave të njeriut dhe të drejtave LGBT. Ai ftoi këto grupe interesi të marrin hapa përpara në këtë drejtim.

Pas ceremonisë Ambasadori u ul në një bisedë miqësore me aktivistët ku u diskutuan disa nga prioritetet dhe problematikat aktuale të lëvizjës LGBT në Shqipëri.

Çmimi ACT Now jepet çdo muaj, dhe kjo ishte hera e 17^-të. Me këtë çmim u vlerësuan edhe organizatat e tjera LGBT në vend.  

PINK LGBT Pro Shqipëri, stafi dhe anëtarët e saj falenderojnë përzemërsisht Ambasadën e Shteteve të Bashkuara për mbështetjen e tyre të vazhdueshme në rrugëtimin e gjatë dhe të vështirë të avancimit dhe mbrojtjes së të drejtave të personave LGBTI në Shqipëri dhe në botë.

Kur martesat e gjinisë së njëjtë ishin një rit i krishterë

28 Maj 2014 – Përkundër miteve dhe debateve të kohës, koncepti i krishtërimit për martesën nuk është gdhendur në gur që nga ditët e Krishtit, por ka evoluar si koncept dhe ritual. I ndjeri Profesor Xhon Bosuell, shef i Departamentit të Historisë pranë Universitetit të Yale (Jeil) në ShBA zbuloi në dokumentet liturgjike të Kishës antike, bashkësi martesore jo vetëm mes gjinive të ndryshme por edhe mes gjinive të njëjta. Ndër këto dokumenta u zbuluan ceremoni të quajtura “Zyra e Unionve të Gjinisë së Njëjtë (të shekujve të 10të dhe 11të) por edhe të “Urdhërit të Bashkimit të dy Burrave” (shekujt e 11të dhe 12të).

Ritet kishtare ku bashkoheshin dy persona të gjinisë së njëjtë, kishin gjithë simbolikën e martesave heteroseksuale: i gjithë komuniteti mblidhej në kishë, çifti bekohej në altar teksa takonin duart e djathta, bëheshin betimet e shenjta, një prift zyrtarizonte bashkimin përmes Eukarisë[1] dhe gjithçka përfundonte me festën ku merrnin pjesë gjithë të ftuarit. Të gjithë këto elementë shfaqen edhe në ilustrimet artistike të asaj kohe, si përshembull unionin e shenjtë të Perandorit-Luftëtar Bizantin, Bazili i Parë (867-886 Erës së Re) dhe partnerit të tij Xhon.[2]  

Në muzeun a artit të Kievit në Ukrainë, gjendet një ikonë interesante nga Manastiri i Shën Katerinës në Malin Sinai të Izraelit. Aty shfaqen dy shenjtorë të krishterë. Në mes tyre ndodhet një “mblesëtar” (i quajtur ndryshe pronubus) ose shoqërues i çiftit, teksa kujdeset për martesën. Ky pronubus shfaqet të jetë Krishti. Çifti që po martohet janë të dy burra.

Mos vallë ikona sugjeron se është duke u zhvilluar një “martesë” gej e shenjtëruar nga vetë Krishti? Ideja mund të duket shokuese, por përgjigjet vijnë nga vetë burimet e hershme kishtare. E tillë është ikona e Shën Sergius dhe Shen Bachus, dy ushtarë romakë që njihen si martirë të krishtërimit. Këta dy oficerë të ushtrisë romake, provokuan inatin e Perandorit Maksimilian kur u ekspozuan se ishin të krishterë, pasi refuzuan të futen në një tempull pagan. Të dy shenjtorët u dërguan në Siri rreth vitit 303 të Erës sm Re, ku mendohet se Bachus u vra nga gjuajtjet me kamzhik. Ndërkohë mendohet që Sergius ti ketë mbijetuar torturës por më pas vdiq duke i prerë kokën. Legjenda thotë se Bacchusit iu shfaq Sergius si ëngjëll, duke e ftuar të jetë i fortë sepse shumë shpejt ata do të bashkohen në parajsë. 

St. Sergius dhe St. Bacchus

Ndërkohë që vendosja krah për krah e shenjtorëve ishte diçka e zakonshme, sidomos në krishtërimin e hershëm, vendosja krah për krah e këtyre dy burrave konsiderohet nga kritikët si veçanërisht intime. Në një shpjegim të tijin, Severus, Patriarku i Antokias[1] (512-518 e Erës sonë) thoshte se “nuk mund të ndajmë me fjalë ata (Sergius dhe Bachus) që janë bashkuar në jetë. Ky nuk është një rast i thjeshtë dashurie vëllazërore”. Në përshkrimet e bëra gjatë shekullit të 10-të për dy shenjtorët, Shën Sergius festohet si “bashkëudhëtari dhe i dashuri i ëmbël” i Shën Bacchus. Marrëdhënia e ngushtë e Sergius dhe Bachus i ka shtyrë shumë studiues modernë të besojnë së marrëdhënia mes tyre ishte ajo e dy të dashuruarve. Ndërkohë, dëshmia më e fortë që mbështet këtë qëndrim është teksti i parë dhe origjinal i martirizimit të tyre, shkruar në Testamentin e Ri Grek duke i përshkruar ata si “erastai” ose “dashnorët” (lovers). Me fjalë të tjera ata ishin një çift meshkujsh homoseksualë. Lidhja dhe marrëdhënia e tyre jo vetëm që njihej, por pranohej dhe festohej në kishën e hershme e cila del të ketë qenë shumë më tolerante se Kisha e sotme.

Unionet e krishtera mes gjinisë së njëjtë kanë ndodhur edhe në Irlandë gjatë shekujve të 12-të dhe të 13të, siç shkruhet nga historiani Gerald i Wellsit (Geraldus Cambrensis).

Unionet e gjinisë së njëjtë në Europën para-moderne na paraqesin në mënyrë të detajuar disa ceremoni mes gjinisë së njëjtë të gjetura në dokumente liturgjike antike. Një rit grek i shekullit të 13-të përkujtonte Shën Sergin dhe Shën Bacchus, dhe i bënte thirrje Perëndisë të “mbrojë ata, Shërbëtorët e tij, që të dashurojnë njëri-tjetrin dhe të mos jenë shkak skandali për gjithë jetën e tyre, me ndihmën e Perëndisë dhe gjithë Shenjtorëve”. Ceremonia mbyllet me fjalët “dhe ata do të puthin Ungjillin e Shenjtë dhe njëri-tjetrin”.

Një tjetër rit është ai serb i shekullit të 14-të, me bashkimin e dy burrave dhe dy grave, me çiftet që vendosnin duart e tyre të djathta në Ungjill duke mbajtur kryqe në duart e majta. Pasi puthnin Ungjillin, çiftet kërkohej të puthnin njëri-tjetrin, pas të cilit, pas kryerjes së Eukarisë, do ti bekoheshin në bashkim.

Të dhëna për martesa mes gjinisë së njëjtë janë gjetur në arkivat e Vatikanit, Shën Petërburgut, Parisit, Stambollit dhe të Sinait duke mbuluar mbi një mijë vjet nga shekulli i 8-të deri në shekullin e 18-të.

Misionari Domenikan dhe Kryemurgu, Zhak Goar (1601-1653), i përfshin të tilla ceremoni në një koleksion lutjesh ortodokse greke të quajtura “Euchologion Sive Rituale Graecorum Complectens Ritus Et Ordines Divinae Liturgiae”. (Paris 1667)

Ndërkohë që homoseksualiteti ishte teknikisht i paligjshëm që në epokën romake, shkrimet homofobike nuk u shfaqën në Europën Perëndimore deri në fund të shekullit të 14-të. Edhe atëhere, Kisha vazhdoi të shenjtëroje martesat mes gjinisë së njëjtë.

Në Kishën e Shën Gjon Lateranit në Romë (e njohur tradicionalisht si kisha e famullisë së Papës), në vitin 1578 u bashkuan në martesë plot 13 çifte të gjinisë së njëjtë, gjatë një ceremonie madhështore e cila u bashkë-përgatit me klerikët e lartë të Vatikanit. Sipas raportit të kohës ata u martuan “duke u bashkuar, duke përdorur të njëjtat Shkrime të Shenjta, pas të cilit ata hëngrën dhe fjetën bashkë”. Një tjetër çift grash është raportuar të jenë martuar në Dalmaci në shekullin e 18-të.

Kërkimet akademike të Profesor Boswellit janë kaq të mirë dokumentuara dhe të vëertetuara saqë ngrejnë pyetje serioze mbi liderët modernë të Kishës dhe të krishterëve heteroseksualë mbi sjelljen e tyre kundrejt homoseksualitetit.

Që Kisha të injorojë faktet historike të evidentuara nga vetë arkivat e saj mund të quhet burracakëri dhe mashtrim. Faktet tregojnë në mënyrë bindëse se atë çka Kisha modern e quan si qëndrimin e saj tradicional dhe të pandryshuar kundrejt homoseksualizmit është në fakt krejt ndryshe.

Kjo vërteton në fakt, se përgjatë dy mijëvjeçarëve të fundit, në famulli dhe katedrale të të gjithë krishtërimit, nga Irlanda në Stamboll apo edhe në zemër të vetë Romës, marrëdhëniet homoseksuale janë pranuar si shprehje të vlefshme të dashurisë së falur nga vetë Perëndia, me gjithë përkushtimin e dy njerëzve për njëri-tjetrin, një dashuri që mund të festohet, nderohet, bekohet përmes Eukarisë, në emër të dhe me praninë e Jezu Krishtit.

FUND

Përktheu në Shqip:  Amarildo Fecanji

Artikulli origjinal në anglisht: http://anthropologist.livejournal.com/1314574.html

Shkrim I Thos Payne nga The Colfax Record

Shënim: Ambasada PINK / LGBT Pro është anëtare e Rrjetit Ndërfetar Global për mbrojtjen e personave me orientim seksual dhe identitet gjinor të ndryshëm (GIN Network). Ky rrjet ndër të tjera synon të ndërtojnë një dialog të shëndetshëm dhe pozitiv midis lëvizjes LGBT në botë dhe institutioneve fetare dhe promovimin e mirëkuptimit, tolerancës dhe pranimit të personave LGBT në komunitetet e të gjitha besimeve fetare në botë.

---

[1] Antokia – Qytet antik grek, i pozicionuar ne Turqine jugore, buze detit Mesdhe. Shen. i përkthyesit

---

[1] Eukaria – Ceremoni e krishterë që përkujton Darkën e Fundit, gjatë të cilës buka dhe vera bekohen dhe më pas konsumohen. Shënim i Përkthyesit.

[2] http://queerhistory.blogspot.com/2010/09/basil-i-of-byzantium-867-886.html Artikull mbi jetën e Perandorit Bizantin. Shënim i Përkthyesit.