Ambasada PINK takohet me Bankën Botërore në Washington

30 Prill 2014 - Përfaqësuesi i Ambasadës PINK / LGBT Pro Shqipëri Z. Altin Hazizaj mori pjesë, në datat 6-12 Prill, në takimin konsultues të Bankës Botërore mbi çështje të orientimit seksual dhe identitetit gjinor (SOGI) në washington, SHBA. Aktivitetet u zhvilluan në kuadër të përpjekjeve të Bankës Botërore për t’iu bashkuar nismave globale në luftën kundër diskriminimit për shkak të orientimit seksual dhe identitetit gjinor.

Takimet e punës u zhvilluan me Presidentin e Bankës Botërore Z. Jim Kim si dhe Drejtorin Ekzekutiv për Shqipërinë, Italinë dhe Greqinë Z. Piero Cipollone. Pjesë e aktiviteteve ishin edhe një seancë dëgjimore në Kongresin Amerikan, një tryezë pune me kongresmenë të ndryshëm dhe takimi me përfaqësues të Administratës së Presidentit të SHBA-ve, Barak Obama.

Aktivistët LGBTI vinin nga pjesë të ndryshme të botës si Shqipëria, Polonia, India, Libani, Brazili, Nigeria, Uganda, Filipinet, Kina, Rusia, Meksika, Kosta Rika dhe Guiana. Ata mundën të ndajnë historitë e diskriminimit dhe persekutimit që personat LGBTI vuajnë mbi baza të orientimit seksual dhe identitetit gjinor. Takimet shërbyen për të ndarë perspektivat e punës që aktivistët bëjnë në vendet e tyre dhe sfidat që hasen për shkak të shtypjes dhe diskriminimit sistematik.

Në shumë vende të botës, Banka Botërore financon projekte në fushën e shëndetësisë, uljes së varfërisë dhe asistencës ndaj refugjatëve. Por për shkak të ligjeve që kriminalizojnë homoseksualitetin ose mungesës së praktikave të mira shumë nga këto fonde nuk shkojnë për pjesë vulnerabël të shoqërisë siç mund të jenë edhe personat LGBT. Aktivistët patën mundësinë të evidentojnë se shpesh fytyrat e varfërisë në vende të ndryshme të botës, përfshi edhe Shqipërinë, janë minoritetet seksuale si klasa të përjashtuara dhe diskriminuara në mjedisin e punës, arsim, shërbimet shëndetësore dhe mbështetjen financiare çka rezulton në veçimin e mëtejshëm të personave LGBT.

 17 anëtarë të Bordit të Drejtorëve Ekzekutivë u takuan me aktivistët për tu njohur me kërkesat e tyre, prej të cilave kryesorja ishte angazhimi i mëtejshëm i BB-re jo vetëm në adresimin e diskriminimit kundër grave dhe personave LGBT por gjithashtu edhe në lehtësimin e hulumtimeve mbi pasojat e diskriminimit.

Së shpejti BB do të përgatisë një model të ri investimi në nivel global, ku ndër të tjera do kërkojë më shumë angazhim dhe përpjekje të shteteve për zhvillimin dhe përparimin e njerëzve pavarësisht orientimit të tyre seksual apo identitetit gjinor.

Në mbrojtje të fjalës së lirë? Arsimi dhe punësimi në pararojë të saj

Kërcënimi më i madh për lirinë e shprehjes vjen kur njerëzit dhe institucionet e marin atë për të qenë dhe nuk bëjnë asgjë për mbrojtjen, garantimin dhe avancimin e saj.

Nga Amarildo Fecanji

10 Prill 2014 – 17 Maji po njihet gjithmonë e më tepër, në Shqipëri dhe në vende të tjera, si Dita Ndërkombëtare kundër Homofobisë dhe Transfobisë (IDAHOT). Fushatat, aktivitetet dhe puna e palodhur e aktivistëve lesbike, gej, biseksualë dhe transgjinorë (LGBT), kanë filluar të kenë efektin e tyre pozitiv. Në vendin tonë me kalimin e viteve aktivitetet kanë parë më shumë pjesëmarrës dhe ndërgjegjësimi ka arritur një audiencë gjithmonë e më të lartë.

Por sfidat, ashtu siç merret me mend, janë të shumta, sepse homofobia e transfobia, ashtu si racizmi, misogjinia e diskriminimi i shumëfshtë janë ende mbizotëruese në kulturën popullore, politike dhe mediatike të vendit. Ndërkohë që aktivistët LGBT shqiptarë, gëzojnë, si gjithë qytetarët e tjerë të drejtën dhe lirinë e shprehjes, fenomene të tilla si auto-çensura, keq-informimi, keq-citimi, sulmet verbale dhe fyese në media e jetën publike dhe propaganda homofobike kundër personave LGBT dhe të drejtave të tyre mbeten shumë problematike.

Një nga çështjet sfiduese në këtë aspekt mbetet kriminalizimi i fjalimeve që nxisin urrejtjen, dhunën dhe veprime të tjera negative kundër personave LGBT. Kjo nuk është aq e lehtë sa mund të duket. Një nga problemet e një ligji kundër fjalimeve të urrejtjes është përkufizimi i fjalës “urrejtje”. Ndryshe nga dhuna dhe krimet fizike, urrejtja është shumë më subjektive. Kështu edhe vija midis fjalimeve të urrejtjes dhe këndvshtrimeve thjesht kundërshtuese dhe homofobike është e hollë dhe shpesh e padukshme.

Fjala e lirë, shprehja e mendimit pranues, kundërshtues apo i çfarëdolloji qoftë ai, është një nga themelet e funksionimit të një shoqërie demokratike, dhe i duhet garantuar të gjithë qytetarëve, qofshin ata mbrojtës apo kundërshtarë të të drejtave LGBT. Por kufiri duhet caktuar. Edhe pse termat ofendues ndaj një grupi social nuk duhet të shërbejnë si argument për të vendosur ligje e sanksione kundër atyre që i përdorin ato, dallimi duhet bërë midis fjalimeve që janë thjesht shprehje e opinionit ndryshe me ato që përbëjnë nxitje, thirrje dhe ftesë për dhunë apo veprim që mund të quhet kriminal kundër një qytetari, për shkak të orientimit të tij/saj seksual apo identitetit gjinor.

Ambasada PINK / LGBT Pro Shqipëri beson se liria e shprehjes, si një e drejtë themelore dhe e patjetërsueshme, duhet ruajtur dhe garantuar në mënyrë të dedikuar nga të gjitha grupet e interesit që përbëjnë shoqërinë e sotme. Ndërkohë që institucionet shtetërore dhe shteti shqiptar kanë marrë hapa shumë pozitive në garantimin e plotë të së drejtës së shprehjes, në përputhje me kushtetutën e ligjet ndërkombëtare dhe kanë ngritur struktura të posaçme për mbrojtjen e zbatimin e tyre, shumë punë mbetet për tu bërë. Ne besojmë se më shumë rëndësi i duhet dhënë edukimit, arsimimit dhe ndërgjegjësimit për mbrojtjen dhe garantimin e lirisë së shprehjes, sidomos të grupeve vulnerabël. Institucionet shqiptare të ngarkuara më arsimimin, mbrojtjen nga diskriminimi, nga abuzimi i autoriteteve, nga trajtimi jo-etik dhejo- dinjitoz duhet të tre-fishojnë përpjekjet e tyre për të implementuar, bërë të njohura dhe integruar në sistemin shoqëror principet e mbrojtjes së të drejtës së shprehjes, me një vlerë të vecantë për minoritetet dhe grupet e diskriminuara. Sistemi arsimor dhe ai i punës duhet të integrohet në atë mënyrë që standartet e barazisë, diversitetit dhe mbrojtjes së minoriteteve të jenë të matshme dhe të domosdoshme për prindërit dhe rekrutimin e punësimin në institucione publike e private.

Në përmbyllje, mbrojtja e  lirisë së shprehjes duhet të shkojë në paralel me mbrojtjen e minoriteteve vulnerabël nga fjalimet e urrejtjes, në mënyrë të vecantë ato që nxisin dhe promovojnë dhunën. Shembujt negativë nga disa vende autokratike duhet të shërbejnë për të demonstruar se sa e rrezikuar është fjala e lirë, nëse qytetarët dhe institucionet nuk marrin masat e duhura dhe nuk punojnë sa duhet për ta mbrojtur atë.

Ambasada PINK prezanton bizneset miqësore ndaj komunitetit LGBT

7 Prill 2014 - Ambasada PINK / LGBT Pro Shqipëri, prej disa javësh ka lançuar faqen më të re me tematikë LGBT në vend, www.lgbtravelalbania.com . Me mbështetjen e projektit LGBT të Këshillit të Europës, me pjesëmarrjen e organizatave LGBT në vend dhe e përkrahur nga Agjencia Kombëtare e Turizmit, faqja synon të jetë një nga burimet kryesore të informacionit për vizitorët LGBT të huaj dhe shqiptarë.

Shumengjyrat e syrit te kalter

E ndërtuar për të qenë sa më e lehtë dhe praktike faqja ka dy audienca kryesore: të parët janë bizneset, aktivitetet e ndryshme publike dhe private të cilat janë miqësore, jo-diskriminuese dhe përkrahëse ndaj personave LGBT, dhe të dytët janë vetë personat LGBT, shqiptarë dhe të huaj të cilët duan të udhëtojnë në destinacione të sigurta dhe të përdorin shërbime jo-diskriminuese ndaj tyre.

Edhe pse Shqipëria është shumë larg të qenurit një destinacion favorit për personat LGBT, për arsye të tilla si infrastrukturë e dobët dhe mungesë e destinacioneve tradicionale për këtë komunitet, dhe me bindjen se çdo shtet, qytet dhe fshat i botës duhet të jetë i sigurtë dhe miqësor ndaj personave LGBT, Ambasada PINK ka menduar krijimin e kësaj faqeje si eksplorim i një terreni të ri prej nga mund të avancohen të drejtat LGBT.

Shërbimet miqësore lidhen me të ndierit të pranuar, të vlerësuar dhe të lirë për tu prezantuar vetëm apo së bashku me partnerët si persona LGBT. Punësimi, një tjetër fushë shumë domethënëse për personat LGBT, mund të jetë një tjetër opsion pozitiv përmes kësaj faqe.

Nje ylber mbi qiellin e Korces

Ndërkohë, www.lgbtravelalbania.com nuk synon të japë perceptimin e gabuar se të drejtat LGBT janë plotësisht të respektuara apo se komuniteti LGBT është plotësisht i integruar në shoqërinë shqiptare. Pavarësisht historive të ndryshme të suksesit dhe arritjeve domethënëse të lëvizjes LGBT, komuniteti vazhdon të jetë në pjesën më të madhe i fshehur pas kornizës heteronormative dhe vizibiliteti i tyre mbetet shumë i ulët.  

Ambasada PINK / LGBT Pro Shqipëri fton të gjitha bizneset, zyrat ligjore, klinikat dhe institucionet e ndryshme private apo publike që të rregjistrojnë aktivitetin e tyre në këtë faqe dhe të jenë kështu një derë e hapur edhe për qytetarët lgbt. Gjithashtu, PINK fton Ministrinë e Turizmit, Ministrinë e Mirëqenies Sociale dhe Rinise, Dhomat e Tregtisë dhe Bashkitë e vendit që të mbështesin dhe promovojnë këtë portal si një hap i mëtejshëm drejt garantimit të barazisë dhe trajtimit miqësor, dinjitoz dhe të qytetëruar të vizitorëve LGBT shqiptarë dhe të huaj. Gjithashtu, PINK fton komunitetin ndërkombëtar në Shqipëri që të promovojnë këtë portal me bizneset e huaja të pranishme në Shqipëri.

Koncepti bazë i krijimit të kësaj faqe është besimi se të gjithë qytetarët, shqiptarë apo të huaj, duhet të trajtohen me respekt, në mënyrë jo-paragjykuese dhe në përputhje me rregullat dhe normat e një shoqërie të qytetëruar nga çfarëdolloj biznesi apo industrie. Ndërkohë që koncepti gay-friendly është një term më shumë amerikan sesa shqiptar, ai përputhet plotësisht me ato që mund të njihen si nevojat bazë të personave LGBT për të mos u ndier të diskriminuar apo të përjashtuar për shkak të orientimit të tyre seksual apo identitetit gjinor.

Politika përfshirëse dhe mos-diskriminuese për personat LGBT

Viti 2014 parashtron për lëvizjen LGBT një sërë objektivash dhe përparësish të cilat burojnë nga nevojat aktuale të komunitetit, arritjet e bëra deri tani dhe punët e planifikuara për këtë vit. Për këtë qëllim Ambasada PINK/LGBT Pro Shqipëri dhe Zyra e Komisioneres për Mbrojtjen nga Diskriminimi organizuan në fillim të këtij viti workshopin “Politika përfshirëse dhe mos-diskriminuese për personat LGBT”, i cili kishte për qëllim të bënte një prezantim të politikave përfshirëse dhe mos-diskriminuese ndaj personave LGBT në vend dhe praktikave më të mira të zbatuara.

Në takim mori pjesë edhe Avokati i Popullit, zv.Ministrja e Punëve të Brendshme, përfaqësues nga Ministria e Mirëqenies Sociale dhe Rinisë, Ministrisë së Integrimit, Ministrisë së Shëndetësisë, Ministrisë së Drejtësisë, Drejtorisë së Përgjithshme të Policisë, Bashkisë Tiranë, përfaqësues të organizatave lokale dhe ndërkombëtare, trupit diplomatik në vend, media, etj.

Takimi u hap nga Moderatori z. Altin Hazizaj i cili tha se nga insitucionet publike dhe ato të pavarura pritet që viti 2014 të hapë një faqe të re përsa i përket respektimit dhe garantimit të të drejtave të komunitetit LGBT në vend. Një plan aktivitetesh i dizenjuar dhe zbatuar bashkarisht do të ishte i mirëpritur. Ai tha se edhe pse Shqipëria sot renditet ndër vendet e para në rajon përsa i përket respektimit të të drejtave të komunitetit LGBT ende mbetet shumë për tu bërë. Organizimi i Paradës do të jetë një ndër prioritet e punës së PE për vitin 2014 dhe për këtë duhet bashkëpunimi dhe mbështetja e të gjithë aktorëve.

Znj. Irma Baraku, Komisionere për Mbrojtjen nga Diskriminimi, në fjalën e saj përmendi punën që ky institucion ka bërë në mbrojtje të komunitetit LGBT nga diskriminimi. Ajo tha se Institucioni ka trajtuar 7 çështje diskriminimi ndaj komunitetit LGBT, në 3 raste shkelësit janë sanksionuar me gjobë dhe në 4 raste të tjera me rekomandime. Aktualisht në kuadër të raportit të përgjithshëm vjetor që zyra harton është duke u punuar edhe për raportin për situatën e komunitetit LGBT, raport i cili do i çohet edhe Parlamentit. Ajo u shpreh se janë bërë disa rekomandime për ndryshime në Kodin e Punës, Kodin Penal, Kodin e Familjes në favor të komunitetit LGBT, jo të gjitha janë marr parasysh por rekomanime do vazhdojnë të bëhen edhe këtë vit. Ajo tha se në vijim do ti jepet rëndësi edhe adrresimit të ankesave tek KMD nga qytetarët dhe të gjitha komunitetet.

Etleva Sheshi, përfaqsuese e MMSR tha se janë bërë hapa pozitivë në drejtim të mbrojtjes dhe garantimit të të drejtave të Komunitetit LGBT në vend. Është hartuar Plani i Masave kundër
diskriminimit për shkak të orientimit seksual dhe identitetit gjinor 2012-2014, i cili udhëhiqet nga MMSR por kanë rol kryesor në zbatimin e tij edhe ministritë, insitucionet e pavaruara dhe OJF-të. Sipas znj. Sheshi, një ndër prioritet e MMSR për vitin 2014 është edhe zbatimi i planit të masave. Ministria ka parashikuar gjithashtu disa ndryshime dhe përshtatje të legjislacionit në fuqi, janë bërë disa rekomandime për ndryshime në kodin e punës dhe atë të familjes. Gjithashtu Ministria është e hapur për bashkëpunim me të gjithë aktorët që do të bënin të mundur trajnimin e stafit që është në kontakt direkt me komunitetin (administratorët socialë dhe punonjësit e zyrave rajonale të punës) dhe për ekspertizë nga modelet pozitive të vendeve të tjera. Ende mbetet sfidë për Shqipërinë sensibilizimi dhe ndërgjegjësimi i shoqërisë sonë për çështjet LGBT dhe ministria do vazhdojë punën për të bërë të mundur këtë ndërgjegjësim. Ajo tha se është duke u pergatitur një plan shtetëror për përmbushjen e rekomandimit 5 të BE për Shqipërinë.

z. Igli Totozani, Avokati i popullit tha se ajo çka vërehet sot në shoqërinë shqiptare është diskriminimi dhe paragjykimi ndaj komunitetit LGBT dhe se institucioni i AP ka qenë dhe vazhdon të qëndrojë në krah të këtij komuniteti. Ai përmendi punën që AP ka bërë në këtë drejtim si, përgatitja e rekomandimeve për ish-ministrinë e Punës për futjen e orientimit seksual dhe identitetit gjinor si shkak për diskriminim në Kodin e Punës, propozim i cili është pranuar dhe shpresohet që të përfshihen në ndryshimet e Kodit. Gjithashtu AP i propozoi Ministrisë së Drejtësisë ndryshime në Kodin Penal, futjen e orientimit seksual tek rrethanat rënduese, ndryshim i cili u miratua dhe ka hyrë në fuqi. Janë bërë disa propozime tek Ministria e Arsimit për ndryshime në tekstet shkollore, janë propozuar ndryshime edhe në Kodin e Familjes për legalizimin e bashkëjetesës mes personave të të njëjtit seks. Ai tha se pavarësisht këtyre ende ngelet shumë për tu bërë, duhet të punojmë të gjithë së bashku për të përfaqësuar interesat e këtij komuniteti.

Më pas z. Artan Karoli, drejtues i Ambasadës PINK bëri një prezantim të broshurës informuese përgatitur nga organizata, qëllimi i së cilës është ndërgjegjësimi i zyrtarëve publikë për terminologjinë dhe çështjet LGBT. Kjo broshurë e parë e këtij lloji për zyrtarët publikë do të shpërndahet në të gjitha institucionet shtetërore.

Znj. Elona Gjebrea, zv Ministre e Punëve Publike, në fjalën e saj shprehu angazhimin personal dhe institucional në mbrojtje të të drejtave të njeriut në vend dhe komunitetit LGBT. Ajo tha se janë shumë të rëndësishme debatet e hapura në nivel lokal për ndërgjegjësimin e publikut dhe shoqërisë.

Pjesa e dytë e takimit, u përqëndrua në diskutime të hapura mes pjesmarrësve dhe konkludoi në një sërë rekomandimesh të cilat duhet të mbahen parasysh nga të gjithë aktorët për iniciativa të përbashkëta përgjatë vitit 2014, në mbrojtjen dhe garantimin e të drejtave të personave LGBT në vend. Përfaqësues të KMD, Ministrisë së Drejtësisë, Ministrisë së Shëndetësisë, MMSR dhe organizatave të shoqërisë civile morën fjalën duke bërë sugjerime e rekomandime.

Disa nga rekomandimet kryesore që dolën nga ky ëorkshop janë:

- Të ndërgjegjësohen dhe trajnohen stafet mësimore për të qenë dashamirës ndaj çdo komuniteti të margjinalizuar;

- Të rishikohen Kurrikulat mësimore për shmangien e programeve diskriminuese;

- Të parashikohen orë të hapura ose ekstra-kurrikulare në shkolla për ndërgjegjësimin e nxënëësve kundër diskriminimit;

- Të ndërgjegjësohen studentët dhe pedagogët e arsimit universitar;

- Të ndërgjegjësohen dhe fuqizohen prindërit e personave LGBT;

- Ministria e Rendit dhe Ministria e Mbrojtjes të hartojnë politika të brendshme për mbrojtjen e personave LGBT;

- Të krijohet Rrjeti  i aktorëve (insitucione shtetërore + OJF) në mbështetje të personave LGBT;

- Të përcaktohen Pikat Fokale në çdo ministri që do të mbulojnë çështjet LGBT;

- Komisioni Kombëtar i Ndihmës Juridike të përfshihet në tryezat e diskutimit për problemet që hasin personat LGBT;

- Të vendosen standarte për kurrikulat /edukimin shëndetësor në shkolla;

- Mjekët e shkollave të jenë pjesë e diskutimeve, prezantimeve me nxënësit, në mbështetje të personave LGBT;

- Të forcohet bashkëpunimi me Kuvendin e Shqipërisë dhe të avokohet për miratimin e ndryshimeve legjislative të propozuara;

- Të trajnohen në vazhdimësi stafet e insitucioneve publike dhe atyre jo-publike si edhe bizneseve për mosdiskriminimin dhe të drejtat e personave LGBT;

- Të ofrohet ekspertizë nga vendet me eksperiencë pozitive në drejtim të respektimit të të drejtave të personave LGBT, për zyrtarët publikë;

- Të ndërmerren fushata ndërgjegjësuese dhe sensibilizuese për publikun e gjerë në nivel kombëtar;

Ligj i ri i BE-së për mbrojtjen e të dhënave personale: Europarlamentarët duan të mbrohet privatësia e personave LGBT

Parlamenti Europian ka miratuar dy ligje të reja për të reformuar mbrojtjen e të dhënave në Bashkimin Europian.

Deri më tani, BE-ja e ka rregulluar mbrojtjen e të dhënave nëpërmjet një direktive të vitit 1995, të papërshtatur mirë me gjithë praninë moderne të të dhënave personale. Komisioni Europian propozoi një kornizë të re të BE-së në formën e dy teksteve ligjore: një udhëzim dhe një rregullore.

Parlamenti Europian miratoi disa ndryshime në këto dy propozime. Ato përfshijnë masa për mbrojtjen e informacionit privat në lidhje me orientimin seksual dhe identitetin gjinor të personave.

Eurodeputetët specifikuan se "përpunimi i të dhënave personale, duke zbuluar racën apo origjinën etnike, mendimet politike, fenë ose bindjet filozofike, orientimin seksual apo identitetin gjinor [...] duhet të ndalohen" (neni 9 i rregullores). Janë parashikuar edhe përjashtime të ngushta.

Rregullat e reja të miratuara sot shtojnë profilizimin, për shembull klasifikimin e individëve në bazë të karakteristikave të tyre personale, "duhet të ndalohet" kur ai "ka efektin e diskriminimit kundër individëve në bazë të racës apo origjinës etnike, mendimit politik, fesë apo besimeve, anëtarësisë në sindikata, orientimit seksual ose identitetit gjinor " (neni 20 në rregullore).

Jan Albrecht, Euro Deputet, anëtar i LGBT intergrup dhe autor i rezolutës së miratuar, ka sqaruar se "Karta e të Drejtave Themelore në mënyrë të qartë përcakton të drejtën e individëve për të patur të dhënat e tyre personale të mbrojtura, dhe kjo rregullore e re garanton pikërisht këtë gjë."

"Është e një rëndësie të veçantë që individët të mos shohin karakteristikat e tyre personale të përdorura kundër vullnetit të tyre - duke përfshirë edhe orientimin seksual e identitetin gjinor."

Sirpa Pietikäinen EuroDeputet, Zv.President i LGBT intergrup dhe zëdhënës i ALDE në këtë rezolutë, shtoi: "Unë jam jashtëzakonisht i lumtur që këto rregulla të reja në mënyrë eksplicite përmendin orientimin seksual dhe identitetin gjinor. Qeveritë kombëtare tani duhet të ndjekin shembullin e Parlamentit, dhe të tregojnë se sa i vlerësojnë të dhënat personale të qytetarëve të tyre. "

Këshilli i Bashkimit Europian, duke mbledhur 28 qeveritë kombëtare të BE-së, duhet tani të miratojë ndryshimet e veta tek propozimet.