Bashkitë angazhohen për avancimin e të drejtave LGBT

Ambasada PINK, Bashkitë, Ministritë dhe institucionet e të drejtave të njeriut angazhohen për përmirësimin e jetës së personave LGBT në nivel komunitar

13 Nëntor 2014 – Ambasada PINK / LGBT Pro, nënshkroi Marrëveshjet dhe Memorandumet e Bashkëpunimit me Bashkitë e qyteteve Tiranë, Durrës, Elbasan, Vlorë, Korçë dhe Shkodër. Kjo ishte një ditë historike për mbrojtjen dhe avancimin e të drejtave të komunitetit LGBT në vend, sepse shënon brenda pak vjetësh integrimin e kauzës LGBT në nivelin vendor, çka e afron atë edhe më shumë me komunitetin.  

Kjo iniciativë, i cila po zbatohet nga Ambasada PINK në bashkëpunim me Avokatin e Popullit dhe Komisionerin për Mbrojtjen nga Diskriminimi dhe mbështetjen e Bashkimit Europian, synon të përmirësojë cilësinë e jetës së personave LGBT në nivel komunitar. Takimi u ndoq dhe u përshëndet nga përfaqësues të institucioneve qëndrore si Znj. Nora Malaj zv. Ministre e Arsimit dhe Sportit, Znj. Merita Xhafaj, Drejtore e Përgjithshme e Politikave Sociale, Z. Igli Totozani, Avokat i Popullit, Znj. Ardiana Hala, Këshilltare pranë Komisioneres për Mbrojtjen nga Diskriminimi dhe përfaqësuesit e Bashkive Z. Arben Beqiraj, nën kryetar i Bashkisë Vlorë, Znj. Antoneta Prifti, nën Kryetare e Bashkisë Elbasan, Znj. Afërdita Zëri, Këshilltare e Kryetarit të Bashksië Tiranë, Znj. Meme Xhaferaj, Drejtore e Shërbimit Social, Bashkia Durrës, Znj. Jeta Xhabija, Specialiste pranë Bashkisë e Marrëdhënieve me Komunitetin Bashkia Shkodër, Znj. Mamica Muko, Specialiste në Zyrën e Mbrojtjes së Komunitetit, Bashkia Korçë, etj.

Nënshkrimi i marrëveshjeve ishte rezultati i disa takimeve të punës dhe trajnimeve pasuese të realizuara më zyrtarë dhe drejtues të Bashkive në fjalë. Që në takimet e para të punës, Kryetarët e Bashkive dhe drejtuesit e tjerë, kanë pranuar se në nivel komunitar ekzistojnë ende sfida të mëdha përsa i takon tematikës LGBT. Ndër më të rëndësishmet veçohen këtu vështirësitë me mentalitetin si dhe padukshmëria e komunitetit. Për këtë arsye ata të gjithë e kanë mirëpritur këtë iniciativë, duke qenë të vetëdijshëm se reformat dhe ndryshimet e mëdha që kanë ndodhur me tematikën LGBT, do të reflektohen tashmë në qendrat më të mëdha urbane në vend. Në fjalën e tij Z. Beqiraj theksoi angazhimin e Bashkisë së Vlorës për të siguruar zgjerimin dhe njohjen e të drejtave të komunitetit LGBT në qytet. Kjo u theksua edhe në komentet e përfaqësuesve të Bashkive të tjera në tryezë. Në këtë ceremoni u ra dakord të nënshkruhen marrëveshje bashkëpunimi edhe me Ministrinë e Mirëqenies Sociale dhe Rinisë dhe Ministrinë e Arsimit dhe Sportit si dy institucione të cilat do të lehtësojnë disa nga aktivitetet e iniciativës. 

Iniciativa do synojë, që brenda 2 viteve të ardhshme të forcojë kapacitetet e punonjësve të administratës së Bashkive në lidhje me çështjen LGBT, të transferojë dijen dhe informacionin përmes materialeve që mund të publikohen, të zbatojë plane veprimi për avancimin e kauzës LGBT në komunitet, njohjen dhe ndërgjegjësimin mbi personat LGBT, të trajnojë mësuesit dhe psikologët e shkollave të këtyre qyteteve, të zhvillojë aktivitete ndërgjegjësuese me qëllim informimin e opinionit publik etj.

Një tjetër aspekt i rëndësishëm i iniciativës është edhe adresimi i çështjes së diskriminimit dhe bulizmit në shkollat e mesme si dhe trajnimi i mësuesve dhe psikologëve në shkolla mbi tematikën. Në fjalën e saj Zv. Ministrja e Arsimit Znj. Nora Malaj theksoi se për të adresuar çështjen siç duhet do të punohet jo vetëm në këtë sektor por gjithashtu edhe në rishikimin e kurrikulave dhe përfshirjen e tematikës LGBT në përgatitjen e mësuesve të ardhshëm, kreditimin e mësuesve aktualë dhe kryerjen një proçes i plotë reformues.

Rezultatet më të rëndësishme të kësaj iniciative do të jenë; shërbime të përmirësuara ndaj komunitetit LGBT nga institucionet qeverisëse vendore, mbrojtje efektive të të rinjve LGBT nga diskriminimi dhe bulizmi në shkolla dhe komunitet dhe integrimi i tematikës në debatet mediatike, të shoqërisë civile dhe ato të opinionit publik të qyteteve në fjalë. Iniciativa do të prodhojë gjithashtu edhe materiale informuese të cilat do të mund të përdoren nga Bashkitë e tjera të vendit.

Ndërkohë në bashkëpunim me Ministrinë e Mireqenies Sociale dhe Rinisë dhe Ministrinë e Arsimit dhe Sportit do të mundësohet zhvillimi i trajnimeve me zyrat e Sherbimit Social dhe Punësimit dhe do të mundësohet zhvillimi i aktiviteteve ndërgjegjësuese dhe informuese me mësuesit dhe psikologët e shkollave të mesme të qyteteve. Drejtoresha e Përgjithshme e Politikave Sociale Znj. Merita Xhafaj theksoi disa nga punët e bëra në kuadër të luftës kundër diskriminimit dhe dha mbështetje të plotë për integrimin e mëtejshëm të çështjes LGBT në programet e përfshirjes sociale. Gjithashtu Znj. Ilda Bozo, Drejtore e Pwrfshirjes Sociale pranw MMSR theksoi rolin që iniciativa si kjo e fundit kanë patur në integrimin e tematikës LGBT në nivel institucional dhe në hartimin e politikave dhe strategjive të institucioneve pjesëmarrëse.

Në fund të aktivitetit u nënshkruan edhe marrëveshjet e Bashkëpunimit midis PINK dhe Bashkive.

Ambasada PINK dëshiron të falenderojë të gjitha Bashkitë dhe institucionet e përfshira në këtë iniciative dhe uron që ky të jetë një fillim i mbarë për integrimin e plotë të tematikës LGBT në të gjitha Bashkitë e vendit.  

Shoqeria Civie kerkon konsultim per Buxhetin 2015

KUVENDI I SHQIPËRISË TË MOS MIRATOJË PROJEKT-BUXHETIN E QEVERISË PËR VITIN 2015 PA U KONSULTUAR ME SHOQËRINË CIVILE DHE GRUPET E INTERESIT NË SHQIPËRI

Drejtuar: Z. Ilir Meta, Kryetar i Kuvendit të Shqipërisë, Z.  Erion Braçe, Kryetar i Komisionit per Ekonomine dhe Financat, Z. Fatmir Xhafaj, Kryetar i Komisionit për Çështjet Ligjore, Administratën Publike dhe të Drejtat e Njeriut, Znj. Albana Vokshi, Kryetare e Komisionit të Punës, Çështjeve Sociale dhe Shëndetësisë, Znj. Vasilika Hysi , Kryetare e Nënkomisionit për të Drejtat e Njeriut, Znj. Olta Xhaçka, Kryetare e Nënkomisionit për Çështjet e të Miturve, Barazisë Gjinore, Dhunës në Familje, Z. Gramoz Ruçi, Kryetar i Grupit Parlamentar të PS-së, Z. Edi Paloka, Kryetar i Grupit Parlamentar të PD-së, Z. Petrit Vasili, Kryetar i Grupit Parlamentar të LSI-së, Z. Fatmir Mediu, Kryetar i Grupit Parlamentar të PR-se, Z. Shpëtim Idriz, Kryetar i Grupit Parlamentar të PDIU-së

                    

E/I Nderuar Zonjë/Zotëri,

Shoqëria Civile  ka tashmë dy ditë që është informuar, nëpërmjet medias së shkruar, lidhur me dorëzimin e projekt-buxhetit të vitit 2015 nga ana e Qeverisë në Kuvendin e Shqipërisë. Njoftimi zyrtar ka ardhur nëpërmjet Ministres së Shtetit për Marrëdhëniet me Parlamentin, znj. Ermonela Felaj, e cila e ka dorëzuar projekt-ligjin për buxhëtin në Kuvend, në datë  3 Nëntor 2014.

Sipas deklaratës së saj, sektorët kryesorë që do të mbështeten nga qeveria për vitin e ardhshëm janë arsimi, shëndetësia dhe infrastruktura. Ajo deklaron se qeveria dhe Parlamenti bashkëveprojnë me institucionet dhe grupet e interesit për të vendosur se si do të përdoren me sa më shumë efektivitet të ardhurat e mbledhura gjatë këtij viti, në 2015-ën. Një version i detajuar draft-Buxhetit për vitin 2015 nuk i është berë publik ende as në faqen e Kryeministrisë dhe as në atë të Kuvendit të Shqipërisë.

Ne duam të shprehim shqetësimin tonë të menjëhershëm mbi faktin që Projekt-Buxheti i Qeverisë për vitin 2015 nuk është konsultuar deri më sot nga asnjë ministri apo institucion publik me  përfaqësuesit e shoqërisë civile në Shqipëri dhe të organizatave joqeveritare, duke thyer kështu një traditë demokratike dhe pozitive të ngritur nga të dy palët pas vite të tëra pune dhe avokatësie, ku programet buxhetore të ministrive gjithmonë janë konsultuar me shoqërinë civile dhe organizatat joqeveritare, si përfaqësuese dhe mbrotjtëse të interesave dhe të të drejtave të grupeve të ndryshme shoqërore.

Për çka më sipër, organizatat që mbështesin këtë deklaratë publike në emër të shoqërisë civile në Shqipëri, i kërkojnë me forcë Kuvendit të Shqipërisë dhe ju si pjestar i saj, që të mos miratoni Projekt-buxhetin e Qeverisë për vitin 2015, pa e konsultuar me pare me shoqërinë civile, organizatat joqeveritare dhe grupet e interesit. Nisur nga eksperienca e seancave dëgjimore që u organizuan gjatë vitit të kaluar, ku ishte e pamundur që të ndryshohej Projekt-buxheti, ne kërkojmë që këtë vit të gjitha komisionet parlamentare të kenë të drejtë të ndryshojnë dhe përmirësojnë programet buxhetore të Qeverisë dhe ku mendimet e shoqërisë civile të jenë vendimtare në këtë drejtim.

Nga ana tjetër, ne nuk mund të rrimë pa sjellë në vemendjen tuaj kërkesën tonë që prezantimi i Projekt-Buxhetit 2015 te mos behët në standartin formal të tij, por të përkëthehet në përqindje të GDP-së dhe sa shkon për të mbështetur çdo grup shoqëror në Shqipëri, me vemendje të posaçme fëmijët, gratë, minoritetet, grupet e margjinalizuara, personat me aftësi të kufizuar etj.

Nisur nga sa më sipër ne do të mirëprisnim dhe jemi të gatshëm të punojmë ngushtësisht me Kuvendin e Shqipërisë dhe ju si përfaqësues të Komisioneve të përhershme parlamentare, për të arritur në një Buxhet të shtetit tonë që merr në konsideratë dhe respekton qytetarët e saj.

Ne shpresojmë në mirëkuptimin dhe mbështetjen tuaj.

Sinqerisht,

Organizatat mbështetëse të kërkesës

1. Agjensia Rajonale  Zhvillimit Vlore - ARZHV
2. Qendra Shqiptare për Popullsinë dhe Zhvillimin
3. Ambasada PINK
4. ARSIS
5. AWEN- Rrjeti i Fuqizimit të Gruas në Shqipëri
6. Albania Community Assist
7. Dimension Human Shkodër
8. Epoka e Re Fier
9. Fondacioni "Harriet Martineau"
10. Fondacioni Shqiptar për të Drejtat e Personave me Aftësi të Kufizuar
11. Forumi i Gruas Elbasan
12. Gruaja Intelektuale Shkodrane
13. Gratë në Fokusin e Zhvillimit  Kuçovë
14. Instituti i Kërkimit Urban
15. Instituti i Kulturës Rome në Shqipëri
16. Koalicioni për Arsimin e Fëmijëve në Shqipëri
17. Koalicioni për Nxitjen e Pjesmarrjes së Grave dhe të Rinjve në Politikë
18. Komiteti Shqiptar i Helsinkit
19. Linja e Këshillimit për Fëmijë - ALO 116
20. Në Dobi të Gruas Shqiptare
21. Observatori për të Drejtat e Fëmijëve
22. Open Mind Spectrum Albania (OMSA) 
23. Partnerë për Fëmijët
24. Qendra Aleanca Gjinore për Zhvillim
25. Qendra per Ndryshim/ Vlorë
26. Qendra për të Drejtat e Gruas Rome
27. Qendra Shqiptare e Rehabilitimit të Traumës dhe Torturës
28. Qendra për Nisma Ligjore dhe Qytetare
29. Res Publica
30. Rinia në Sipërmarrjen e Lirë, Kukës
31. Roma Active Albania
32. Rrjeti i Grave ‘Barazi në Vendimmarrje’
33. Rrjeti i Qendrave për Zhvillim Komunitar "Sot për të Ardhmen"
34. Rinia per te Drejtat e Njeriut Shqiperi (YHR - ALBANIA) 
35. Edukimi Social dhe Mbrojtja e Mjedisit, Vlorw
36. Shoqata Ndihmoni Jetën
37. Shoqata në Mbrojtje të të Drejtave të Kulturës për Fëmijë
38. Shoqata Qëndistaret Korçë
39. Shtëpia e të Drejtave të Njeriut / CRCA Shqipëri
40. Shoqata Rome “Ushten”
41. Të bashkuar pro kauzës LGBT
42. Tirana Legal Aid Society, TLAS
43. Unioni Amaro-Drom